प्रचण्डसँग माया बसेको छ : रेखा थापा

नेताहरुमा मलाई प्रचण्ड विशेष मनपर्छ । मेरो माया पिरती एमाओवादीसँगै छ । एकीकृत माओवादीले नै अहिलेको राष्ट्रिय समस्या समाधान गर्न सक्छ भन्ने मलाई लाग्यो । त्यसैले यो पार्टीमा लागेँ । अरु पार्टीमा जाने कुरै आएन ।

नेपाली सिने जगतमा गहिरो छाप छोड्न सफल नायिका रेखा थपा एकीकृत माओवादीमा प्रवेश गरेकी छन् । यसभन्दा अगाडि पनि माओवादीका अध्यक्ष प्रचण्डसँग नाचेर चर्चामा आएकी रेखा थापा माओवादीमा प्रवेश गर्नुमा प्रचण्डसँगको पुरानै र नजिकको सम्बन्धको महत्वपूर्ण भूमिका रहेको भन्ने धेरैको बुझाई छ । कतिपयले एमाओवादीको राजनीतिक प्रभाव तुलनात्मक रुपमा धेरै भएको बेला चलचित्रसँग सम्बन्धित संस्थाहरुको नेतृत्व हत्याउन सजिलो होस् भनेर रेखा एमाओवादीमा लागेको अनुमान गरेका छन् । आम नागरिकलाई मनोरञ्जन दिने कलाकार यसरी राजनीतिमा लाग्नु कति जायेज हो भन्ने सन्दर्भमा गरेको कुराकानी :

कलाकारिता क्षेत्रबाट राजनीतिमा हाम फाल्नुभएको छ, कस्तो महसुस हुँदैछ ?

जिम्मेवारीको बोध भएको छ । हिजो पनि चलचित्र क्षेत्रमा म जिम्मेवारी नै लिएर हिँडेको थिएँ । रेखा थापालाई चिन्नका लागि नायिका रेखा थापा भन्ने थियो त्यति हुँदा हुदै पनि म समाजका लागि मनोरञ्जनको मार्फतबाट सेवामा लागेको थिए । म अब समाजको सेवामा सक्रिय रुपमा लाग्न चाहन्छु । अहिले देशमा साँचिकै आर्थिक क्रान्तिको आवश्यकता छ । मलाई विदेशमा कार्यक्रममा जाँदा त्यहाँका नेपाली दाजुभाई देखेर साह्रै दुःख लाग्थ्यो । अब देशलाई परिवर्तन गर्नुपर्छ त्यसको लागि म एक्लैले त हुँदैन त्यसका लागि एमाओवादी जस्तो जनताको पक्षमा काम गर्ने पार्टीको साथ मैले लिएकी हुँ ।

संसारमा त्यस्ता धेरै उदारहण छन् कलाकारहरुले समाज परिवार्तनको लागि महत्वपूर्ण भूमिका खेलेका, तपाइँलाई चाहीँ राजनीति नै किन गर्नुपर्यो ?

चलचित्र वा कलाकारिताबाट सहयोग र परिवर्तन नै गर्न सकिँदैन भनेको होइन । कलाकारिताको क्षेत्रबाट पनि मैले गरेकै छु । अब समग्र राष्ट्रको सेवा गर्ने बेला आएको छ । म हजारौ नागरिकसँग हातेमालो गरेर राष्ट्रनिर्माणको अभियानमा लाग्नको लागि एमाओवादीमा प्रवेश गरेकी हुँ । मेरो उद्देश्य कलाकारिता वा राजनीति जे मार्फत भएपनि देश बनाउनु नै हो । पार्टी बाहिर बसेपनि देशकै सेवा गर्ने हो, पार्टीमा गएर पनि देशकै सेवा गर्ने हो त्यही भएर किन बाहिर बस्नु भनेर पार्टीमा प्रवशे गरेँ । यसलाई अन्यथा लिनु हुँदैन ।

माधव नेपाललाई राजीनामा गराउनको लागि माओवादीले गरेको कार्यक्रममा पनि प्रचण्डसँग निक्कै मज्जाले नाच्नु भो । प्रचण्डसँग पहिल्यैदेखि नजिकको सम्बन्ध भएर हो पार्टी प्रवेश गरेको ?

एमाओवादी सँग माया बसेको छ ?

अवश्य ! माया यसकारणले बसेको छ कि एमाओवादी गरिबहरु र सर्वहाराहरुको को पार्टी हो ।

त्यो नाचपछि तपाइँलाई माओवादीको कार्यकर्ता भन्दा खण्डन गर्नुभएको थियो नि ! किन, अहिले त माओवादी मै प्रवेश गर्नुभो ?

त्यतिबेला म पार्टीमा प्रवेश गरिसकेको थिइन । म माओवादी कार्यकर्ता हो भन्ने त्यतिबेला त भ्रम नै थियो नि । त्यतिबेला पनि मैले पार्टीमा गएँ भने सबै जनतालाई अवगत गराएरै जान्छु भनेकी थिएँ, आज मैले त्यहि गरँे । धेरैले सोचेका होलान एउटा अभिनेतृलाई किन पार्टी कार्यकर्ता बन्नु परेको होला भनेर तर मलाई के लाग्छ यही हो परिवर्तन भनेको । म सँधै अग्रगामी कुरा सोच्ने मान्छे एउटा त्यहि भएर राजनीतिमा लागे । कलाकारिताको क्षेत्रमा मैले जनताको माया पाइसकेँ अब राजनीतिमा लागेर अझ बढी माया बढाउँछु ।

अब तपाइँलाई अभिनेतृ भन्ने कि राजनीतिज्ञ ? तपाइँको पेशा कलाकारिता कि राजनीति ?

कलाकारिता गर्नेले राजनीति गर्न हुदैन भन्ने कुरामा म सहमत छैन । रचनात्मक काममा लागेका हामीले देश निर्माणमा रचनात्मक भुमिका निर्वाह गर्न सक्छौं । कलाकारले राजनीति गर्नुहुदैन भन्ने सोच संर्किण सोच हो । अभिनेतृ रेखा थापा सबैको साझा हो तर मेरो वैचारिक सोच कुनै पार्टीसँग मिल्न सक्छ । म राजनीति गर्न पाउँछु गर्छु । म कलाकार र राजनीतिज्ञ दुबै हो ।

अहिलेसम्म सबैको नजरमा कलाकार मात्र रहनुभयो, अब एमाओवादीको कार्यकर्ता मात्र भइरहँदा आफ्नो साख घट्छ कि भन्ने लागेको छैन ?

मलाई त्यस्तो लाग्दैन । मलाई झन् धेरैले माया गर्नुहुन्छ जस्तो लागेको छ । मैले हिजो चलचित्र क्षेत्रमा क्रान्ति गरेकी थिएँ, अब राजनीतिमा गर्छु । त्यसपछि झन् आम जनताको माया बढ्नेछ ।

अब हुने निर्वाचनमा तपाइँ उम्मेदवारको रुपमा उठ्ने सम्भावना छ कि छैन ?

चुनाव लड्छु, मन्त्री हुन्छु, सभासद हुन्छु भन्ने मोहले म पार्टी प्रवेश गरेको होइन । पार्टीको एजेण्डा म पूर्ण प्रतिबद्ध छु । म कर्मठ कार्यकर्ता हुँ । म नम्वर एक नायिका हुँ, यसरी नै माया पाए भने राजनीतिमा सफल हुन्छु ।

चलचित्र क्षेत्रका प्रतिस्पर्धीहरुलाई चुनौती दिनको लागि पार्टी प्रवेश गर्नुभएको त होइन ?

(लामो हाँसो) यस्तो मैले किन सोच्नु पर्यो ? समयले तह लगाउँछ सबैलाई ।

श्रोत:ओएनएस