वीरगन्ज,१ वैशाखः आज बैशाख १ गते अर्थात् विक्रम सम्वत् क्यालेण्डर अनुसार नयाँ वर्ष २०७० सालको पहिलो दिन । नयाँ वर्षको शुरुवात्मा रमाइलो गर्ने र वर्षैभरि हासीखुशी दिन बिताउने अवसर मिलोस् भन्दै आज नेपाली नागरिकहरुले विभिन्न स्थानमा पिकनिक तथा पार्टी मनाइ रहेका छन् ।
वीरगन्जको भिस्वा, भुटनदेवी, विन्दवासिनी, बाराको गढीमाई, निजगढ, चुरियामाई अमलेखगन्ज,हेटौंडाको भुटनदेवी,शहीद स्मारकलगायतका स्थानमा पिकनिक तथा पार्टी मनाएर रमाइलो गर्नेहरुको बिहानदेखि भीडभाड लागेको छ ।
नयाँ वर्षको शुरुवातका दिन मन्दिरहरुमा पूजा आजा गर्नका लागी हिन्दू भक्तजनहरुको पनि भीड लागेको छ ।
नयाँ वर्षको आगमनसँगै आम नेपालीले संविधान सभा निर्वाचन यसै वर्ष होओस् र देशले स्थायी संविधान र स्थायी सरकार प्राप्त गर्न सकौं भन्ने कामना गरेका छन् ।
राजनीतिक दलहरुको खिंचलो, विदेशी शक्तिहरुको चलखेल र नेपालको भू अवस्थितिका कारण सहजैरुपमा संविधान सभाको निर्वाचन नेताहरुले भाषणवाजी गर्दै असार वा मंसिरमा हुने भने झैं सहज नभएपनि चाँडोभन्दा चाँडो संविधान सभाको निर्वाचन होओस् भन्ने कामना गर्दै नयाँ वर्ष २०७०का अवसरमा हाम्रा सम्पूर्ण पाठक, शुभचिन्तक, विज्ञापन तथा र आम नेपालीहरुमा हार्दिक शुभकामना व्यक्त गर्दछौं ।
Nepalese Rupee Exchange Rate