बि.सं. २०७३ शान्ति र सिर्जनाको वर्ष बनोस्

–सन्तोष मिश्र

हामी बाँचेको यस जटिल संसारमा नयाँ वर्ष आउने, जाने क्रम चलिरहन्छ । नयाँ वर्षमा प्रत्येक मानिसले नयाँ नयाँ सकारात्मक आशा लिएको हुन्छ, शान्ति र सिर्जना चाहेको हुन्छ । सांसारिक दु:खबाट मुक्त हुन खोजेको हुन्छ । भनिन्छ सुखै सुख मात्र पनि होइन जिन्दगी । जीवनमा सुख, दु:ख आइरहन्छ । दु:ख र शोकलाई शक्तिमा बदल्ने, खुशीलाई शान्ति र सिर्जनमा बदल्ने प्रयास जारी राख्नु पर्दछ । परिवर्तनको निरन्तरतालाई स्वीकार्नु पर्दछ । परिवर्तन प्रकृति र विज्ञानको नियम हो ।

नेपाली जनताको घर आंगनमा नयाँ वर्ष २०७३ को शुभारम्भ भएको छ । नयाँ वर्षको सुनौलो विहानीको उत्सुकतापूर्वक पर्खाइमा रहेका नेपाली जनता ‘बिहानीले दिनलाई देखाउँछ’ भन्ने कुरामा विश्वास गर्छन् । विहानीलाई पवित्र र शुभ घडी मान्न्छि । यस समयमा कुनै प्रकारको अनैतिक काम देखा पर्‍यो भने वर्ष दिनभरी नै नराम्रो देख्न र सुन्न र भोग्न पर्छ भनिन्छ । विक्रम संवत् २०७३ सुखद बनोस्, सम्पूर्ण नेपालीले मेलमिलाप पूर्वक अमन चयनका साथ वर्ष दिनभरी रमाउन पाउन्, कहिं कतै अनिष्ट नहोस्, राम्रा राम्रा सपना र अवसर मात्र नेपालीका लागि मिलुन् । शासक, प्रशासकमा सद्वुद्धि देखियोस् । संसारैभरी नेपाली जनताको शान्ति सिर्जनाको कामनाले स्थान पाओस् ।

पाप कर्म र अधर्मको नाश होस् । कुनै प्रकारको शोषण, उत्पीडन र द्वन्द्व कायम नहोस् । यत्र तत्र सर्वत्र उन्नति, प्रगति, सुख, शान्ति मात्र छाओस् । समय बलवान हुन्छ । समयको नियति मानिसले ब्योहोर्न नै पर्दछ । ध्वंसात्मक गतिविधिहरु निर्माणमा रुपान्तरण हुन् । प्राकृतिक महाविपत्ति र मानिसद्वारा मानिसमाथि गरिने सबै प्रकारका कुकृत्यको अन्त्य होस् । नयाँ वर्ष मानिस, पशुपंक्षी, वनस्तपत्ति र इश्वरका सम्पूर्ण सृष्टीकालागि सुखद रहोस् ।

पृथ्वीको कुनै पनि कुनामा कसैले अकाल मृत्युवरण गर्न नपरोस् । शान्त वातावरण, समृद्ध संसार नयाँ वर्षको नारा बनोस् । नेपाल र नेपालीको भाग्य र भविष्य उज्ज्वल बनोस् । सबै अधुरा सपनाहरु पूरा होउन् । राष्ट्र निर्माणकालागि अघि सारिएका अधुरा र अपूरा सबै कार्यहरु आपसी सहयोग र सदभावका साथ पूरा होउन् । नयाँ वर्ष २०७२ उल्लेखख्य उपलब्धीको ऐतिहासिक वर्ष बनोस् । यही हाम्रो मंगलमय शुभकामना । आदरणीय पाठक वर्ग, विज्ञापनदाता, शुभ चिन्तक, शुभेच्छुक र सम्पूर्ण नेपालीहरुमा उतरोत्तर प्रगतिको कामना । आइपर्ने सबै कार्यको एकैसाथ गर्न सकौं सामना ।

वि.सं. २०७३ मा नेपालमा रहेका विश्वभर छरिएका सम्पूर्ण नेपाली तनावबाट मुक्ति चाहन्छन् । सत्यको बाटो, सकारात्मक दिशा पहिल्याउन चाहन्छन् । नयाँ वर्षका सबै दिन, सबै क्षण शुभ मुर्हुत होउन् । खोक्रो आश्वासन, भ्रम र अधुरो सपनाबाट मुक्त हुन नेपालीले पाउन । भ्रष्ट, नालायक, अयोग्य, असक्षम, बेइमान नेता, कार्यकर्ता, शासक, प्रशासकहरूकालागि नयाँ वर्ष दु:खदायी बनोस् । गल्लीका भुस्याहा कुकुर सरह बन्न खोज्ने तुच्छ व्यक्तिगत स्वार्थकालागि मात्र दौडिने, गलत प्रवृत्ति र व्यवहारका मानिसहरूले दु:ख पाएको हेर्न पाउन सबै नेपालीले । सभ्य सुसंस्कृति समाज निर्माण, सामाजिक, आर्थिक रुपान्तरण, सबैखाले द्वन्द्वको आर्थिक, सामाजिक, सांस्कृतिक, कुटनीतिक, राजनीतिक अनैतिक सबै आधारहरु भत्काएर शान्ति र सिर्जनाको प्रगतिवादी संसार निर्माण गर्ने अवसर नयाँ वर्ष २०७३ बनिदिए सर्वत्र सौन्दर्य हुन्थ्यो । रोग र भोकबाट संसारका सबै मानिसहरूले मुक्ति पाएको देख्न सुन्न नयाँ वर्षका ३६५ दिनहरुमा पाइयोस् । बिक्रम् संवतले निरन्तरता पाओस् । क्राइमचेक साप्ताहिक परिवार हार्दिक मंगलमय शुभकामना व्यक्त गर्दछ ।

प्रकाशन मितिः २०७३ वैशाख २ गते बिहीवार

SHARE THIS