यतिखेर मधेश आन्दोलन र सीमा नाका अवरोधको मौकाछोपी खुल्ला सिमानाको भरपुर फाइदा उठाउँदै भारतीय वस्तुहरूको खुल्लेयाम तस्करी धन्दा र कालोबजारी भइरहँदा पनि नियन्त्रण र अनुगमन गर्ने निकाय किंकर्तव्य विमूढ बनेका छन् ।यहि हो असफल राष्ट्रको संकेत ! सरकार छ, प्रशासन छ भन्ने अनुभूति कहिं कतै छैन । आन्दोलनकारी र सुरक्षाकर्मीबीच दोहोरो भिडन्त भयो भन्ने समाचार बाहेक राम्रो समाचार सुन्न र शान्ति र विकास देख्न नपाइने भएको छ । मुलुकभर पेट्रोलियम पेट्रोलियम पदार्थ लगायत दैनिक आवश्यकताका धेरै वस्तुको हाहाकार छ । निर्वाध, नि:शंकोच भारतबाट चोरी पैठारी भइ आएका वस्तुहरूको भाउ साविकको मूल्य भन्दा पाँच गुना बढिले वृद्धि भएको छ । हुनेखाने वर्गहरूले महंगो मूल्य तिरेर दैनिक आवश्यक वस्तुहरू जीवन गुजारा गरिरहेपनि वहुसंख्यक हुँदाखाने वर्ग हाहाकार र मूल्यवृद्धिका कारण भोकभोकै छन् । अब भोकाएका, काम र मामबाट बञ्चित भएका नेपाली जनताहरूको धैर्यता आक्रोशमा परिणत हुने संकेत देखिंदैछ । नेपाली जनताले अहिले जस्तो संकट न बिगतमा भोगेका थिए न भोली नै भोग्नु पर्ला, अनिष्टकारी प्रधानमन्त्री ओली सरकार रहेसम्म दु:ख र सास्तीबाट नेपाली जनताले मुक्ति पाउने कुनै लक्षण छैन । देशलाई टाट उल्टाउन मद्दत पुग्ने गरी अवैध तस्करी र कालो बजारी चलिरहेको छ । कालोबजारी प्रति सरकार अनुत्तरित छ । अहिले रेकर्डतोड कालोधन्दाको समानान्तर भन्सार कायम हुँदा पनि टुलुटुलु हेरिरहनुपर्ने अवस्थाको सिर्जना ओली सरकारले गरेको छ ।
निरंकुश एवं तानाशाह भनिएको शासनकाला अर्थात पञ्चायती व्यवस्थाताका पनि भारतले नेपालमाथि नाकाबन्दी लगाएको थियो तर तत्कालीन मरिचमान सिंह श्रेष्ठ नेतृत्त्वको सरकारले तेश्रो मुलुकबाट आयात गरेर भएपनि जनतालाई कहिल्यै अभावको महसुश हुन नदिएको भुक्तभोगीहरू बताउँछन् । तर यतिखेर गणतन्त्र नेपाल सरकारकै नियन्त्रणमा रहेको आयल निगमका हरेक डिपो पेट्रोलियम पदार्थले भरिभराउ रहँदा पनि जनता चार दिन लाइनमा बसेर, कालो मूल्य तिरेर खरिद गरिरहनु परेको तर सरकारले मौन रुपमा जम्माखोर कार्य र कालोबजारीलाई प्रोत्साहन दिने कार्य गर्दै आएको छ । आफ्नो निकम्मा शासन सत्ता टिकाउन ओली सरकारले बाध्यात्मक परिस्थितिको उपज भनेर पन्छिने गरेको छ । देश अराजकतावादी, कालोधन्दाकारीको कब्जामा कैद छ । खुल्लेयाम कालोबजारी र तस्करी धन्दा भइरहँदा पनि रोक्न नसक्ने वर्तमान परिस्थितिले अर्थतन्त्रलाई नहसनहस नै पार्दछ ।
आम जनताले बजारमा भएको सामान महंगो मूल्यका कारण किन्न र जीवन धान्न नपाएपछि सकरारप्रति जनताको धारणा नकारात्मक हुँदै गणतन्त्रबाट मोहभंग हुँदै गएको छ । सरकारको यस्तै रवैया रहिरहने हो भने जनताले पुन: पुरानो व्यवस्थाकोलागि निर्णायक आन्दोलन गरी शान्ति, एकता र विकासकोलागि राजतन्त्रात्मक शासन व्यवस्था पुनस्र्थापना गराउन अघि नसर्लान् भन्न सकिन्न र यसैमा सबैको भलो पनि छ ।
प्रकाशन मितिः २०७२ माघ ०७ गते बिहीवार
Nepalese Rupee Exchange Rate