स्वाइन फ्लुबाट सभासद ढकालको निधन

काठमाडौ, चैत्र २२ - स्वाइन फ्लु पिडित भएर उपचार गराइरहेका एमाले नेता एवं पूर्व सभासद् रामनाथ ढकालको निधन भएको छ । अघिल्लो शुक्रबार ग्रान्डी अस्पताल भर्ना भएका ५९ वर्षीय ढकालको केहीबेर अघि निधन भएको हो । अस्पतालका निर्देशक डा. चक्रराज पाण्डेले ढकालको निधन भएको बताए । 'उहाँलाई स्वाइन फ्लुका साथै क्षयरोग र क्यान्सर थियो, यसले गर्दा रोगसँग प्रतिरोध गर्ने क्षमता एकदमै कम भएको थियो,' उनले भने ।

एमाले नेता भानुभक्त ढकालले पनि रामनाथ ढकालको निधन भएको जानकारी दिंदै उनको अन्त्येष्टिको लागि परिवारसँग सल्लाह गरिने बताए ।

एमाले सचिव योगेश भट्टराईले ढकालको अन्त्येष्टीको लागि पार्टीमा छलफल हुँदै गरेको जानकारी दिए ।

गत शुक्रबार आफैले गाडी चलाएर उपचारको लागि अस्पताल पुगेका ढकाललाई आइतबार दिल्लीको एपोलो अस्पताल लाने प्रयास गरिएको थियो । ढकाललाई लिन दिल्लीबाट बोलाइएको एयर एम्बुलेन्स मौसम प्रतिकुलताको कारण उड्न सकेन ।

उनी संसदको राज्य व्यवस्था समितिका सभापति समेत थिए । श्रोतः कान्तिपुर