फोहोरमैलामा डुबेको, भ्रष्टाचारमा रमाएको वीरगंज उप–महानगरपालिका

–सन्तोष मिश्र
वीरगंज उप–महानगरपालिका कार्यालयको मूख्य काम वीरगंज नगरको १९ वटै वडालाई सबै दिन स्वच्छ, स्वस्थ, हराभरा, सुन्दर राख्नु हो । सरसफाईमा एक दिन गरेर पुग्दैन, एक हप्ता गरेर हुँदैन , सरसफाई निन्तर हुनु पर्दछ । वीरगंज उप–महानगरपालिका कार्यालयलाई राम्रोसँग औंल्याउने हो भने ‘फोहोर मैलामा डुबेको भ्रष्टाचारमा रमाआएको देखिन्छ ।’ वीरगंज नगर पूरै दूर्गन्धित छ । जताततै हानीकारक फोहोमैलाका डंगुर छन् । फोहोरमैलाको उचित व्यवस्थापन वीउमनपाबाट भएकै छैन ।
वीउमनपाका कार्यकारी अधिकृत ताराबहादुर कार्की लगायत सरसफाई कर्मचारीहरूले आफ्नो काम र कर्तव्यलाई भूल्दै गएका छन् । फोहोरमैला व्यवस्थापनकालाग बजेट रकम छ तर फोहोर मैलाको उचित व्यवस्थापन गरिएको छैन । मेनरोडको आइलैण्डमा फोहोर राख्ने ड्रम राखिएको छ ।नगरबाट उठाइएको फोहोर नगरकै सडक छेउछाउमा मिल्काइएको छ । कालो प्लाष्टिक अर्थात् पोलिब्यागलाई लगाउन सक्दा सिंगो नगरपालिका कालाम्य भएको छ ।
फोहोरमैलामा डुबेको वीउमनपाका कर्मचारी भ्रष्टाचारमा रमाएका छन् । सबै शाखा, महाशाखामा भ्रष्टाचार र घुषखोरी व्याप्त छ । ड्युटी आवरमा सरसफाइ कर्मचारी लगनशीलता र इमान्दारीपूर्वक काम गर्दैनन् । यतिखेर वीरगंज नगरमा विकास बजेटको दुरुपयोग र भ्रष्टाचार भइरहेको छ ।
विहान गरेको पीच बेलुकी नै भत्किएको पाइन्छ । ढल निकासको उचित व्यवस्था नहुँदा पीच सडकमा पोखरीमा पानी जमेझैं जम्ने गरेको छ । जानाजानी सडक पीचको नाममा बजेट रकमको दुरुपयोग र भ्रष्टाचार गरिएको छ । गुणस्तरहीन काम ठेकेदार र कर्मचारीको मिलोमतोमा भइरहेको छ । असार महिनामा नगरभित्रको सडक पीच गर्ने काम गरियो । तर सडकमा पानी नजम्ने व्यवस्था मिलाइएन ।

नेपाल सरकारका मूख्य सचिव लिलामणी पौडेल वीरगंज भ्रमणमा आएका बखत वीरगंजभित्र जथाभावी फोहोरमैला फ्याँकिएको र फोहोरको डंगुर थुप्रिएको देखेपछि फोहोर सफा गर्न आदेश दिएका थिए । मूख्य सचिवको आदेशपछि नगरको सफाई गर्नमा केही जाँगर देखाइएको छ । सानो वर्षा भएमा पनि सडक जलमग्न हुने वीरगंजमा मूल ढल निकासको व्यवस्था नै छैन । नालाहरूको सफाइका क्रममा निकालिएको फोहोरमैला, माटो, सडक किनारमा थुपारिंदा सहर र सडक झन फोहोरी बनेको छ । वीरगंज उप–महानगरपालिकाको गैर जिम्मेवारीपनको वर्णन गरेर साध्य छैन । ‘कुरा गर्ने, काम गर्दै नगर्ने’ कार्यकारी अधिकृत कार्कीको बानीले वीरगंज नगरको फोहोर व्यवस्थापन चुनौती बनेको छ ।
वीरगंज नगरको सरसफाइमा यतिखेर नेपाली सेना, सशस्त्र प्रहरी, नेपाल प्रहरीसहितको  टोली जुटेको छ । विशेष सरसफाइमा जुटेका नेपाली सेना, नेपाल प्रहरी र सशस्त्र प्रहरीले केही हप्ता नगर सरसफाइमा साथ देलान त्यसपछि सरसफाई गर्ने सम्पूर्ण दायित्व नगरपालिकाको नै हो । सरसफाई गर्न बजेट, कर्मचारी, साधनश्रोत सबै छन् तर सरसफाइमा निरन्तरता दिने नीति र कार्यक्रम छैन । कार्यकारी अधिकृतमा नगरलाई स्वच्छ र सफा राख्ने इच्छाशक्ति र अठोट छैन । कर्मचारीहरूबाट काम लिन नसक्ने, नेतृत्व दिन सक्ने क्षमता अधिकृत कार्कीमा देखिएन । तलब भत्ता पचाउनु, दिनको समय बिताउनु नगरपालिकाका कर्मचारीहरूको प्रवृत्ति देखिन्छ । ढल निकासको उचित व्यवस्थापन नभएसम्म वीरगंज नगरलाई वर्षायाम र अघिपछि पानी परेको बेला जलमग्न हुनबाट जोगाउन सकिंदैन । कतिपय सडक होचाछन्, पानी बग्ने नालामा फोहोर फाल्ने प्रवृत्ति रोक्ने कस्ले ? फोहोरमैला व्यवस्थापन गर्ने दायित्व नगरवासीहरूको पनि हो । आफ्नो घर अगाडीको सडकमा फोहोर हुनै नदिन नगरवासीले नगरपालिकालाई उचित दबाव दिइरहनुपर्दैछ ।
फोहोरमैलाबाट दुर्गन्ध मात्र फैलिंदैन, माहामारी, नानाथरिका रोग पनि फैलिन्छ । नगरवासीहरूमा फोहोरमैलाका बारेमा चेतना जागृत हुनुपर्दछ । नगरमा गाइवस्तु छाडा छाडिनु, नगरमा कुकुरको बिगबिगी हुनु, सडक जलमग्न हुनु, सडकको किनारामा फोहोरमैला थुपारिनुले सुन्दर नगर बनाउनुपर्ने वीरगंजलाई कुरुप नगरमा परिणत गरिएको छ । डम्पिङसाइटमा फोहोरमैला फाल्ने व्यवस्था अझै नगरपालिकाले गर्न सकेको छैन । नगरभित्र हराभरा हरियाली छैन । नगरलाई सुन्दर बनाउन रुख विरुवा रोपिएको छैन । सडक पेटीमा फोहोर थुप्रिंदा बटुवाहरूलाई हिंड्न समेत अप्ठेरो परेको छ ।
नगरभित्र सर्वशुलभ नि:शुल्क शौचालय छैन । दिशामुक्त क्षेत्र नगरपालिका बन्न सकेको छैन । ट्राफिक व्यवस्था लथालिंग छ । वि.पी. उद्यानको जग्गामा पसल राख्न दिइनु र फोहोर फालिनुले नगरपालिका कार्यालयको नगरको विकास निर्माणमा कस्तो सोच छ भन्ने छर्ल· हुन्छ । बसपार्क छ तर बसपार्कमा बस नरोकी सडकमा बस रोकिन्छ । वीरगंज नगरभित्र राम्रो भन्ने कुरा केही छैन जसको मुखबाट पनि वीरगंजमा लामखुट्टे, भुसुना, झिंगा, बढेको, फोहोरको दुर्गन्ध फैलिएको सुनिन्छ । ‘हाम्रो वीरगंज राम्रो वीरगंज’ बनाउन फोहोरमैलालाई प्राथमिकता दिइनुपर्छ ।
 प्रकाशित मिति:२०७१ साउन १ गते बिहीवार
इ पेपरमा पढ्न यहाँ थिच्नुहोस्....

SHARE THIS