कमिशनको आधारमा शिक्षा कार्यालयबाट रकम वितरण

क्राइमचेक प्रतिनिधि/
वीरगंज/सञ्चालनमा नै नआएका जिल्लाका बैकल्पिक विद्यालय, सामुदायीक अध्ययन केन्द्र र समुदायमा आधारित बालविकास केन्द्रलाई जिल्ला शिक्षा कार्यालय पर्साले धमाधम रकम वितरण गरिरहेको छ ।
जिल्लाको सोनवर्षा, देवरवाना, महादेवपटि, पिडारिगुठि, विजबनिया, सेढवा, बरवाछटौलि, विरुवागुठि, हरपुर, वागवाना, मधुवनमथौल लगायतका गाविसहरुमा सन्चालनमा नै नरहेका बैकल्पिक विद्यालय र समुदायमा आधारित बालविकास केन्द्रलाई शिक्षा कार्यालयले आर्थिक बर्ष सकिन लाग्दा अहिले धमाधम रकम बाडिरहेको हो । विद्यालय जान नसकेका र प्रारम्भिक शिक्षाका लागि बालबालिकालाई लक्षित गर्दै यस्तो शिक्षा लागु गरिए पनि सन्चालनमा नै नआइ शिक्षा अधिकारी बर्खु रजकले कमिसनको आधारमा रकम निकासा गरिरहेको शिक्षा कार्यालयकै कर्मचारीहरु   बताउँछन् ।
यस्तो शिक्षा सन्चालनका लागि जिल्ला शिक्षा कार्यालयले विभिन्न संघसस्था तथा क्लबलाई जिम्मा दिनुका साथै केहि स्थानमा आफैले पनि सहयोगि शिक्षक राख्ने गरेको छ । विद्यालय जान नसकेका ८ बर्ष देखि १४ बर्ष सम्मका बालबालिकालाई अनौपचारीक तवरबाट कक्षा ३ सम्मको अध्ययन गराउने उद्धेश्यले विभिन्न संघसस्था तथा क्लबका साथै शिक्षा कार्यालयले आफ्नै कर्मचारी राखेर बैकल्पिक विद्यालय सन्चालन गर्ने गर्छ । यस्तै ३ देखि ५ बर्ष उमेर समुहका बालबालिकालाई लक्षित गर्दै संघसस्था तथा क्लबलाई जिम्मा दिइएको बालविकास केन्द्र पनि सन्चालनमा नरहेको भेटिएको छ ।
जिल्लामा सन्चालनमा रहेको भनिएको बालबाविका केन्द्र र बैकल्पिक विद्यालयका बारेमा जिल्ला शिक्षा समितिबाट कुनै अनुगमन नभएको समितिका संयोजक स्थानिय विकास अधिकारी दिलिप चापागाइले बताउनुभयो । चालु आर्थीक बर्ष सकिन लाग्दा शिक्षा अधिकारी बर्खु रजकले बालविकास केन्द्र र बैकल्पिक विद्यालय सञ्चालन गर्ने संघसस्था र क्लबसंग कमिसन लिएर अहिले धमाधम रकम बाँडिरहेको शिक्षा समितिका सदस्यहरुले आरोप लगाएका छन् ।
प्रकाशित मिति:२०७१ असार २६ गते

SHARE THIS