शास्वत सत्यलाई कसैले नकार्न सक्दैन – सन्तोषकुमार मिश्र

हुने हुनामी टारेर टर्दैन, बगेको खोलाको पानी फर्किएर आउँदैन । शास्वत सत्यलाई कसैले नकार्न सक्दैन । तर्क र परिस्थिति अनेक हुन सक्दछन । समय र शास्वत सत्य एउटै हुन्छ । मनुष्य र पृथ्वीका बीचका अन्तरसम्बन्ध अकाट्य सत्यका रुपमा स्वीकार्नु पर्ने हुन्छ । पृथ्वी कुरुप हुँदा मनुष्यको अस्तित्व पनि रहदैन । सौन्दर्य विश्रृंखलित हुन जाँदा प्रकृति माथि पनि संकट आइपर्छ । प्रकृतिको अवसानमा मानिस जाति नभएर सम्पूर्ण बनस्पति, पशुपंक्षीको अवसान पनि निश्चित छ । प्रकृतिको गतिशिलतामा विज्ञानले प्रतिस्पर्धा गर्न सक्दैन । सर्वे भवन्तु सुखिन:को सिद्धान्तलाई आत्मसात गर्ने हो भने कसैले पनि कसैको अस्तित्वलाई नकार्न मिल्दैन । सबैखाले शोषण र विभेदको अन्त्य नभई शान्ति हुँदैन । शान्ति नभई विकास हुँदैन । वर्तमान अशान्तिले विश्वभर जनधनको क्षति भएको छ । पृथ्वी अशान्त हुँदा, मौसम परिवर्तन हुँदा ठूला ठूला प्राकृतिक विपत्ति निम्तिएका छन । नैसर्गिक सुख, प्राकृतिक न्यायको अनुभूति र प्रत्याभूति गर्ना हामी सबैले प्रकृतिमय भएर बाँच्नु जान्नु पर्दछ । बाँच्ने कला सिक्नु पर्दछ । प्रत्येक विश्वका मानिसहरु
यतिखेर संकटमा छन । विश्वका समग्र मनुष्य जातिलाई संभावित दूर्घटनाबाट सुरक्षित हुनका लागि सचेत र सतर्क बनाउने काम भइरहेको छ । त्यो सतर्कता भनेको हाम्रो आचार विचार र जीवनशैलीलाई सुधार गर्नु हो । सकारात्मक परिवर्तन र रुपान्तरण नै पवित्र क्रान्ति हो । क्रान्ति भनेको एक मनुष्यले अर्को मनुष्यमाथि प्रहार र विनास होइन । सबैलाई सही बाटो, एउटै शान्ति र विकासको मूल बाटोमा हिंडाउन सक्नु नै असल क्रान्ति हो । बर्तमानमा विश्वमा भइरहेको क्रान्ति एउटै प्रवृत्ति भएका मानिसहरु बीच एकले अर्कोको अस्तित्व समाप्त पार्न भएको क्रान्ति हो । क्रान्तिले क्रान्ति जन्माएको छ, कहिं कतै शान्ति छैन । सकारात्मक सोच, सिर्जनात्मक चिन्तन र सामूहिक विकासका अवधारणा र कार्यान्वयनबाट परिवर्तनका अभूतपूर्व उपलब्धिहरु हासिल गर्न सकिन्छ । कुनै भूगोलमा बसेको सामान्य मानिसको असाधारण विचारबाट देश र जनताको सर्वोत्तम हित हुन्छ । बर्तमान राजनीति व्यवस्थामा सामाजिक व्यवस्थामा अव्यवस्था छ । अनशासनहीन काम कारबाही अघि बढेका छन । जताततै कोलाहल छ तर विज्ञान र प्रविधिको गानि रोकिएको छैन । चरम विकास भएको छ । धनी धनी भइरहेको छ तर सबै धनी हुने अवसर खिइदै गएको छ । धनी र गरिब बीचको लडाइ जारी छ । आफ्नो स्वार्थ र हितका लागि राष्ट्र–राष्ट्र, व्यक्ति–व्यक्ति लड्दा सामूहिक स्वार्थ ध्वस्त भएको छ । विश्वनै ध्वस्तको संघारमा उभिएको छ । प्राकृतिक असन्तुलन, मानवकृत प्रदूषणले प्राकृतिक बिपत्ति, बिनाश र अधर्मलाई मलजल पुगिरहेको छ । खगोल भूगोल र बनस्पतिसँग सँगै प्राणी जातिको आरोग्यको कामना गर्ने र आरोग्यमय तुल्याउने प्रविधि मनुष्यताको उपल्लो श्रेष्ठतामा सुरक्षित छ । देव शक्ति छ मनुष्यमा ।

SHARE THIS