अहँ मैले सुनेकै छैन
यो काठमाण्डौको खाल्टोमा भित्रिएदेखि
एकता सदभाव माया ममताका कुरा
यहाँ त खिचातानी हुन्छ
प्रत्येकका खुशीहरूमा
मैले गाँस काटेर किनेका खुशीहरूमा
तपाईंको, उनको, उनीहरूको राज चल्छ
जन्मैदेखि झगडा गर्न सिकाइन्छ
अधिकारका नाममा...
डाक्टर बिरामी कुल्चेर आन्दोलन गर्छन्,
इन्जिनियर आन्दोलन गर्छन्,
कर्मचारी आन्दोलन गर्छन्,
शिक्षक आन्दोलनको पाठ पढाउँछन् र
उत्साहित बनाउँछन् आन्दोलनकारी बन्न...।
मैले अरुबाट “मिलौं” भन्ने शब्द सुनेकै छैन
खलासीको मुख बाहेक,
ढोकामा उभिएर ऊ भन्छ, “मिलेर बस्नु, मिलेर बस्नु”
तिम्ले तुच्छ ठानेको पेशा अंगालेको ऊ
तिमीभन्दा धेरै महान छ... त्यसैले
म मेरो छोरो खलासी बनाउँछु ।
सूचना आचार्य
गोरखा
हाल: काठमाण्डौ
प्रकाशन मितिः २०७२ फागुन १३ गते बिहीवार
Nepalese Rupee Exchange Rate