निर्वाचन अधिकृतहरू प्रदर्शनमा

भत्ताको विषयमा विवाद हुँदा तालिम अवरुद्ध

क्राइमचेक प्रतिनिधि/

वीरगंज/निर्वाचन कार्यालयले सञ्चालन गरेको मतदान अधिकृत तथा सहायक मतदान अधिकृतहरुको तालिममा भत्ताको विषयलाइ लिएर विवाद उत्पन्न हुँदा झण्डै ५ घण्टा तालिम अवरुद्ध भएको छ ।

            तालिममा सहभागी ७ सय ५० जना मतदान अधिकृत तथा सहायक मतदान अधिकृतहरुलाई निर्वाचन कार्यालयले तालिममा सहभागिता जनाए बापत ३ हजार ९ सय ५० रुपैया दिनु पर्नेमा १ हजार रुपैयाँ मात्रै दिने सुचना टाँस गरे पछि सहभागी कर्मचारीहरु विरोधमा उत्रदा तालिम नै अवरुद्ध हुन पुगेको हो ।

            तालिम चलिरहेको श्रीपुर उच्च मावि परिसरमा नाराबाजी र निर्वाचन विरुद्ध प्रदर्शन हुन थालेपछि त्यसलाई साम्य पार्न प्रमुख जिल्ला अधिकारी कैलाश कुमार बजिमय, ५ वटै क्षेत्रका निर्वाचन अधिकृतको कार्यालयका प्रमुखहरु पुगेका थिए ।

            आक्रोशित कर्मचारीहरुले निर्वाचन कार्यालयले कर्मचारीको संख्या

तोकेर लाखौको भ्रष्टाचार गर्न लागेको र ४० रुपैयाँको नास्तामा ४ सयको बिल तथा ८ सयको ब्यागमा १२ रुपैयाँको किटव्याग थमाएको भन्दै तालिम परिसरमा कागज पत्र र किटव्याग छरेर प्रदर्शन समेत गरेका थिए ।

            निर्वाचन कार्यालयले मतदानका लागि खटाउने कर्मचारीका लागि आयोजना गरेको तालिममा लाखौँको भ्रष्टाचार गर्न खोजिएको भेटिएपछि आफुहरुले त्यसको विरोध गरेको तालिममा सहभागी सहायक मतदान अधिकृत रविनन्दन सिंहले बताउनु भयो ।

            यता निर्वाचन कार्यालय पर्साका प्रमुख मधुकर पोखरेलले निर्वाचन आयोगको निर्देशन बमोजिम आफूहरुले तालिम लिन आएका कर्मचारीलाई टिए, डिए र आर्थिक नियमावली अन्तर्गत उपलब्ध गराउन सक्ने भत्ता मात्र दिने अधिकार रहेको हुँदा सोहि मुताबिक गर्दा कर्मचारीहरु विरोधमा उत्रेको बताउनु भयो । अन्य जिल्लामा आयोगको निर्देशन विपरित काम भएको समेत पोखरेलले बताउनु भयो । पोखरेलले बारा जिल्लामा निर्देशन विपरितको काम हुँदा पर्सामा समेत निर्वाचन कार्यालयलाई जबरजस्ती भत्ता उपलब्ध गराउन बाध्य बनाइएको समेत खुलासा गर्नु भयो ।

            यसैबीच तालिममा सहभागि मतदान अधिकृत र सहायक अधिकृतहरु नै मत हाल्ने तरिकाबाट अनभिज्ञ बनेका छन् । तालिममा सहभागिलाई नमुना मतदान गराएर देखाउनु पर्ने भए पनि नमुना मतदान गर्ने कार्य नै नगरी तालिम समापन गरिएको हुँदा निर्वाचनमा खटिने अधिकृतहरु अन्यौलमा परेका हुन् । तालिममा सहभागिता जनाए पनि मतदान अधिकृत र सहायक अधिकृतहरु निर्वाचन कसरी सम्पन्न गर्ने भन्ने विषयमा समेत अन्यौल रहेको सहभागीहरुले बताएका छन् ।(प्रकाशित मिति २०७० कार्तिक २८ गते बिहीबार)

SHARE THIS