सडकपेटी भाडामा ? सानालाई सास्ती–ठूलालाई मस्ती

क्राइमचेक प्रतिनिधि/
वीरगंज/वीरगंज नगरमा न्यायालय छ, प्रशासन छ, प्रहरी छन्, ट्राफिक प्रहरी छन्, नगर प्रहरी छन्, नियम छन्, कानुन् छन्, शासन छन्, प्रशासन छन् तर यी सबै गरीब निमूखा र असहायहरूमाथि सास्ती गर्नकालागि मात्र छन् । यी निकायहरू सानाकालागि शत्रु र ठूलाकालागि मित्रुको रुपमा प्रस्तुत भएर अगाडी बढिरहेको देख्दा आम नगरवासीहरू चकित छन् ।
केही समय यता वीरगंज नगरका विभिन्न सडक र सडक पेटीमा सानोतिनो अस्थायी फुटपाथे पसल संचालन गरिरहेका गरिब व्यवसायीहरूको सामान, पसलेहरूले आफ्ना पसल अगाडी राख्ने गरेका स्टेण्ड बोर्ड, चिया पसलेले आफ्नो पसल अगाडीको नालामाथि र सडक पेटीमा राखेका स्टूल, बेन्चलगायतका सामग्रीहरू उठाएर नगरपालिकाले धमाधम कारवाही गर्न थालेका थिए ।
नगरपालिकाको कारवाहीबाट आजित भएर ती फुटपाथे व्यवसायीहरू बिकल्प खोज्दै भौंतारिइरहेका छन्, उनीहरूको पक्षमा बोलिदिने कोही छैनन् तर वीरगंजका ठूला व्यवसायी र होटेलहरूले सडक पेटी र व्यस्त सडकलाई नै पार्किङस्थल बनाएर कानुन मिचिरहेको देख्दा समेत कुनै निकायले कारवाही गर्ने आँट गर्न सकेको छैन ।

प्रसँग वीरगंजकै चर्चित होटेल मकालु, होटेल पूजन लगायतका होटेलहरूको हो । मेनरोडको मूख्य चोकमै सडक अतिक्रमण गरी बनाइएका यी होटेल अगाडी दिनहुँ ट्राफिक प्रहरी, नेपाल प्रहरी र सशस्त्र प्रहरीहरू ड्युटी खटेका हुन्छन् ।
होटेल मकालु र पूजन होटेल स्थापित रहेको ठाउँमा कलेज छ, अस्पताल छन्, मन्दिर छन्, जहाँ दिनहुँ भीड लाग्ने गरेको हुन्छ । सोही स्थानको सडक पेटीमा नै  होटेलमा आउने ग्राहकहरूको गाडी पार्किङ गर्न लगाउने होटेल संचालकलाई कारवाही गर्नुको साटो ती प्रहरीहरू तिनका गाडीको कुरुवा बनि बसिरहेका देखिन्छन् ।
 यसरी सडक पेटीमै पार्कि· गरिंदा स्कूल/कलेजका विद्यार्थी, विरामी, बटुवा, मन्दिरका भक्तजनहरू मूख्य सडकबाट नैं हिंडडूल गर्नुपर्ने बाध्यता छ । जसले कुनै पनि बेला दूर्घट्ना निम्त्याउन सक्छ भन्नेतर्फ कसैको ध्यान जान सकेको छैन ।
ती ठाउँहरूमा खटिने ट्राफिक, सशस्त्र र नेपाल प्रहरीहरू ड्यूटी भन्दा मोबाइल खेलाएर बसेको देख्दा बाहिरका जिल्लाबाट आउने आगन्तुकहरू “वाह, क्या गज्जबको ड्यूटी” भन्दै व्यङ्ग्य गर्ने गरेका छन्  ।
सडक पेटी, जेब्रा क्रस लगायत जथाभावी सार्वजनिक बाटो प्रयोग गर्ने जोकोही भएपनि नियमानुसार कारवाही गर्नुपर्ने भएपनि पर्सा प्रहरी, ट्राफिक प्रहरी वा नगरपालिकाले ती ठूला होटेलहरूमाथि कारवाही नगर्नुको रहष्य के हो ?
कतै नगरपालिकाले ती सडकपेटी ठूला होटेललाई भाडामा त दिएको छैन ? सर्वत्र चासो र कौतुहलताको विषय बनेको छ ।

(प्रकाशित मितिः२०७१ मंसिर २५ गते बिहीवार)

SHARE THIS